ე კ ო ნ ო მ ი ს ტ ი
ივანე ჯავახიშვილის სახელობის თბილისის სახელმწიფო უნივერსიტეტის პაატა გუგუშვილის სახელობის ეკონომიკის ინსტიტუტის რეცენზირებადი, ბეჭდურ-ელექტრონული, საერთაშორისო სამეცნიერო-ანალიტიკური ჟურნალი |
|
|
ჟურნალი ნომერი 4 ∘
ლუკა ლაზვიაშვილი ∘
საქართველოში შემოსავლების განაწილების ანალიზი საიმონ კუზნეცის მეთოდოლოგიაზე დაყრდნობით რეზიუმე. სტატია წარმოადგენს ჩემს მიერ 2018 წლის ივლისში, თბილისის ივანე ჯავახიშვილის სახელობის სახელმწიფო უნივერსიტეტში დაცული სამაგისტრო ნაშრომის - „ინკლუზიური ეკონომიკური ზრდის მაკროეკონომიკური პოლიტიკა“ - დასკვნითი ნაწილის შემოკლებულ ვერსიას. სტატიაში საქართველოს ეკონომიკა გაანალიზებულია საიმონ კუზნეცის[1] მეთოდოლოგიის მიხედვით, რომელიც მან „კუზნეცის მრუდის“ კონცეფციის შექმნისას გამოიყენა.[2] ანალიზი ნათელს ფენს ისეთ საკითხებს, როგორებიცაა საქართველოში მოსახლეობის სხვადასხვა ფენის შორის არსებული განსხვავებები შემოსავლების კუთხით, ეკონომიკის ინკლუზიურობა და შედარებითი პოზიცია შესადარ ქვეყნებთან, განხილულია წარსული წლების ეკონომიკური სურათი, განსაზღვრულია ამჟამინდელი მდგომარეობა და მოცემულია მომავლის სავარაუდო სცენარი. (განსაკუთრებული მადლობა ეკონომიკის დოქტორს, პროფესორს და ჩემს ხელმძღვანელს სამაგისტრო ნაშრომზე მუშაობისას, ბატონ ნოდარ ხადურს, რომელმაც კრიტიკული შენიშვნებითა და რჩევებით დიდი როლი ითამაშა ნაშრომის საბოლოო სახით შექმნაში.) საკვანძო სიტყვები: ინკლუზიურობა, უთანაბრობა შემოსავლებში, კუზნეცის მრუდი, მშპ ერთ სულზე, საშუალო შემოსავლები შესავალი ნაშრომში მსურს საქართველოს ინკლუზიური ეკონომიკური ზრდა და განვითარება გავაანალიზო საიმონ კუზნეცის მეთოდოლოგიის მიხედვით, რაც უნდა ავსახო მის მიერვე შემუშავებულ „კუზნეცის მრუდზე“. აღვნიშნავ, რომ „კუზნეცის მრუდი“ არის გამოსახულება ემპირიული მონაცემებისა და სპეციალური მოდელის, რომლის შიგნითაც დაკმაყოფილებული უნდა იყოს გარკვეული დაშვებებისა და პირობების მოთხოვნები. ჩვენი ქვეყნის შემთხვევაში მისი კონცეფციის ზუსტ ასახვას არ უნდა ველოდოთ, ვინაიდან ჩვენთან ეკონომიკური განვითარების პროცესი ბუნებრივად არ დაწყებულა სხვა ქვეყნების კვალდაკვალ, ის ხელოვნურად იქნა დაბრკოლებული, ხოლო შემდეგ ერთბაშად აღმოჩნდა სუვერენულ პირობებში დამოუკიდებელი ეკონომიკით. ამასთან, კუზნეცის ეპოქისგან განსხვავებით, ამჟამინდელ განვითარებულ ქვეყნებში, ინდუსტრიულის მაგივრად, მოწინავე ტენდენციად ითვლება პოსტ-ინდუსტრიული განვითარება. საქართველოში კი ორივე: ინდუსტრიულიც და პოსტ-ინდუსტრიული განვითარებაც ერთობლივად მიმდინარეობს, განსხვავებით იმ ბუნებრივად განვითარებული ქვეყნებისგან, რომლებმაც დროსთან თანაშეზომილად, ჯერ ინდუსტრიულ განვითარებას მიაღწიეს, შემდეგ კი პოსტ-ინდუსტრიულ ტენდენციებს გაჰყვნენ. ესეც კიდევ ერთი განსხვავებაა კუზნეცის მოდელის დაშვებებისგან. საგულისხმოა, რომ კუზნეცის მოდელი ხსნის ეკონომიკური ზრდის გავლენას უთანაბრობაზე, და არა პირიქით. უთანაბრობის გავლენა ეკონომიკურ ზრდაზე ცალსახად დასტურდება და ამ საკითხს თანამედროვე ეკონომიკაში დიდი ადგილიც ეთმობა. საპირისპირო მიმართულების გავლენა კი შედარებით ბუნდოვანია და ინტენსიური კვლევაც ნაკლებად წარმოებს. სწორედ ამიტომ, კუზნეცის მეთოდოლოგია კვლავ უალტერნატივოა ამ დამოკიდებულების ახსნაში და აქტუალობასაც ინარჩუნებს, ვინაიდან მისი სრული თუ ცალკეული ფრაგმენტული რეალიზება თანამედროვე ეკონომიკაშიც დასტურდება. ამას ადასტურებს რობერტ ბარო თავის 2009 წლის ნაშრომში[3]. ამის დასტურია 2008 წელს გამოქვეყნებულ, ინკლუზიური განვითარების შესახებ პირველ ცნობილ პუბლიკაციაში[4] ნახსენები „კუზნეცის-ტიპის უთანაბრობაც“, საიდანაც ჩანს, რომ თანამედროვე, ინკლუზიური ზრდის სტრატეგიაშიც კუზნეცის მეთოდოლოგიას კვლავ ითვალისწინებენ საერთაშორისო ორგანიზაციები. ასე, რომ კუზნეცის მეთოდოლოგიაზე დაყრდნობით საქართველოს ეკონომიკის ანალიზი არ ნიშნავს უტყუარი მიზეზ-შედეგობრივი კავშირების აღმოჩენას და პროგნოზირებას, ან რაიმეს დადასტურებას, არამედ წარმოადგენს საიმონ კუზნეცის საერთაშორისოდ აღიარებული კონცეფციის მიხედვით საქართველოში შემოსავლებში უთანაბრობის ახსნის მცდელობას და პოტენციური სცენარის შექმნას. (ტექსტის იმ ადგილებში, სადაც არ არის მითითებული მონაცემთა წყაროები, ყველგან გამოყენებული მაქვს საქართველოს სტატისტიკის ეროვნული სამსახურის მონაცემთა ბაზა) შემოსავლებში უთანაბრობის ზრდის ფაქტორები (საწყისი სტადია) კიდევ ერთხელ ვთქვათ, რომ ჩვენს ეპოქაში აღარ არის აქტუალური ინდუსტრიალიზაციის პროცესი, იმდენად, რამდენადაც მსოფლიოში მიმდინარეობს პოსტ-ინდუსტრიული განვითარების პროცესი. ასე, რომ საქართველოში და მისნაირ განვითარებად ქვეყნებში ინდუსტრიული და პოსტ-ინდუსტრიული პროცესები კომბინირებული სახით მიმდინარეობს. საქართველოში 2017 წელს მთლიანი გამოშვების მხოლოდ 24.5% მოდიოდა მრეწველობაზე, 12.8% - ვაჭრობაზე, 13.1% - მშენებლობაზე, მხოლოდ 7.2% - სოფლის მეურნეობაზე, და 6.1% მომსახურების გაწევაზე (დანარჩენ დარგებს აღარ ვასახელებ).[5] დავიწყოთ საწყისი სტადიის ფაქტორებით, რომლებიც ჩვენი ამჟამინდელი რეალობისთვის მეტად სახასიათო უნდა იყოს. საქართველოს ეკონომიკის კუზნეცისეული ანალიზისთვის საჭიროა გვქონდეს შინამეურნეობების შემოსავლების შესახებ ინფორმაცია, რაც პირდაპირი სახით საქსტატის ვებ-გვერდზე არ დევს, თუმცა ამავე ვებ-გვერდზე არის შინამეურნეობების ინტეგრირებული გამოკვლევების მონაცემთა ბაზები. აღნიშნული გამოკვლევები ატარებს შემთხვევითი შერჩევის ხასიათს და განზოგადების წესით გვაძლევს გარკვეულ სურათს მთლიანად ქვეყნის მასშტაბით არსებული მდგომარეობის შესახებ. ამასთან, აღნიშნული გამოკვლევები ტარდება 2009 წლიდან და, შესაბამისად, სწორედ დროის ამ მონაკვეთის გაანალიზებას გთავაზობთ საოჯახო მეურნეობებისთვის. ამისათვის გამოვიყენე შინამეურნეობების მთლიანი ყოველთვიური შემოსავლების სტატისტიკა, სტატისტიკური პროგრამა STATA-ს დახმარებით დავალაგე ის ზრდის მიხედვით და დავყავი კვანტილებად, 20%-იან ჯგუფებად. შედეგად მიღებული სურათი სრულ თანხვედრაშია კუზნეცის მიერ განვითარებად ქვეყნებთან დაკავშირებით ჩამოყალიბებულ კანონზომიერებასთან, რომ მაღალი უთანაბრობა განვითარებად ქვეყნებში გამოწვეულია, არა იმდენად ბოლო კვანტილის დაბალი წილით საერთო შემოსავლებში, არამედ მოსახლეობის ყველაზე მდიდარი კვანტილის ზედმეტად მაღალი მაჩვენებლით. შუა 3 კვანტილი ბევრით არ აღემატება ბოლო კვანტილს, ხოლო ყველაზე მდიდარი კვანტილი ამ ოთხივეს მკვეთრად აღემატება, რაც ნიშნავს, რომ ძლიერი საშუალო ფენა ფაქტიურად არ არსებობს და ადგილი აქვს მაღალ უთანაბრობასაც. სწორედ ასეა საქართველოს შემთხვევაშიც. 2009 წელს კვანტილების შემოსავლების წილები მთლიან შემოსავალთან ზრდის მიხედვით შემდეგნაირად გამოიყურება: 4.20%, 8.89%, 14.23%, 22.58%, 50.10%. ხედავთ თუ როგორ ჩამორჩება პირველი 4 კვანტილის წილი უმდიდრესი 20%-ის წილს. 2016 წლისთვის მდგომარეობა მცირედით გაუმჯობესდა და შემდეგი სურათი მოგვცა:
თუმცა, უმდიდრესი კვანტილის მაჩვენებელი კვლავ მკვეთრად აღემატება დანარჩენი კვანტილების მაჩვენებლებს. უნდა აღინიშნოს უთანასწორობის მცირედი შემცირების ფაქტიც. ამის უკან დგას ის, რომ ქვედა კვანტილების საშუალო შემოსავალი უფრო მაღალი ტემპით იზრდებოდა ამ წლების განმავლობაში, ვიდრე მდიდარი კვანტილების საშუალო შემოსავლები. წარმოგიდგენთ ჰისტოგრამას, სადაც ასახულია კვანტილებში საშუალო შემოსავლების ზრდის საშუალო ტემპები:
როგორც ხედავთ, მაჩვენებლები იდეალურად არის განაწილებული ეკონომიკის ინკლუზიურობის უზრუნველსაყოფად. რაც უფრო დაბალ შემოსავლიანია მოსახლეობის კვანტილი, მით უფრო მაღალია მისი საშუალო შემოსავლის ზრდის საშუალო ტემპი. გთავაზობთ უმდიდრესი და ყველაზე დაბალშემოსავლიანი კვანტილების საშუალო შემოსავლის ზრდის ტემპებს წლების მიხედვითაც:
როგორც ჩანს, 2010 და 2015 წლების გარდა, უმცირესი კვანტილის შემოსავლების ზრდა მუდამ აჭარბებდა უმდიდრესის ზრდას. ინკლუზიური ეკონომიკური ზრდისთვის საჭირო მეორე კომპონენტი, სიღარიბის შემცირების პროცესი საქართველოში 2010 წლიდან სტაბილურად მიმდინარეობს. 2010 წელს საქართველოს მოსახლეობის 37.3% სიღარიბის აბსოლუტურ ზღვარს ქვემოთ იყო, 2017 წელს კი ამ მაჩვენებელმა 21.9% შეადგინა. გამოდის, რომ 2010 წლიდან მოყოლებული ეკონომიკური ზრდა საქართველოში ინკლუზიურობის კომპონენტებს აკმაყოფილებდა. ყველაზე მეტად ინკლუზიური ზრდა დაფიქსირდა 2012 წელს, როცა პირველი კვანტილის საშუალო შემოსავლები 26.12%-ით გაიზარდა, მეხუთე კვანტილისა კი მხოლოდ 5.16%-ით, სიღარიბის მაჩვენებელი კი მთელი 4 პროცენტული პუნქტით დაეცა (34.1% - 30%). ამ წელს მშპ-ს რეალური ზრდის ტემპი 6.4% გახლდათ. თუმცა, უნდა ითქვას, რომ მნიშვნელოვანია არა მხოლოდ სწორი განლაგება ზრდის ტემპებისა, არამედ ინტენსივობაც. ჩვენი ქვეყნის შემთხვევაში, იმდენად ჩამორჩება ქვედა კვანტილი ყველაზე მდიდარ კვანტილს, რომ ზრდის ტემპებში აღნიშნული განსხვავებები საკმარისი არ არის, კიდევ უფრო მეტი სხვაობაა სასურველი. ამის საილუსტრაციოდ შემოგთავაზებთ ხაზოვან დიაგრამას, სადაც ნაჩვენებია 2009 წლიდან 2016 წლამდე როგორ გაიზარდა განსხვავება საოჯახო მეურნეობების საშუალო შემოსავლების აბსოლუტურ მაჩვენებლებს შორის:
შინამეურნეობების ყველაზე ღარიბი კვანტილის წარმომადგენლისთვის დიდად მანუგეშებლად ვერ გამოიყურება უმდიდრეს კვანტილთან შედარებით 4%-ით უფრო სწრაფი ზრდა შემოსავლებში, როცა აბსოლუტურ მაჩვენებლებში მისი საშუალო შემოსავალი მხოლოდ 118.61 ლარით გაიზარდა, როცა უმდიდრესი კვანტილის საშუალო შემოსავლის ნამატი 851 ლარი გახლავთ. საბოლოოდ კი მისი შემოსავალი 9-ჯერ ჩამორჩება უმდიდრესი კვანტილის შემოსავლებს. საინტერესო იქნება კვანტილებს შორის შემოსავლის განაწილების განხილვა ჩვენს შესადარ ქვეყნებში. მაგალითად, ინკლუზიური განვითარების ინდექსის განვითარებადი ქვეყნების რეიტინგში ჩვენზე ერთი ადგილით წინ მყოფი (31) მოლდოვა[6], რომელიც ჩვენსავით აღმოსავლეთ ევროპის განვითარებადი ქვეყანაა. ვინაიდან მსოფლიო ბანკის მონაცემთა ბაზაში კვანტილებად ინდივიდები არიან დაყოფილი, და არა შინამეურნეობები, ამ შემთხვევაში ორივე ქვეყნისთვის, საქართველოსთვის და მოლდოვასთვის ვიყენებ ინდივიდუალურ კვანტილებს შორის განაწილებას, რომელიც, როგორც წესი, უფრო ნაკლებ უთანაბრობას აჩვენებს, ვიდრე შინამეურნეობებს შორის განაწილება. ეს სავარაუდოდ გამოწვეულია იმით, რომ მდიდარი ინდივიდები ერთი და იმავე შინამეურნეობებში იყრიან თავს და უთანაბრობის მაჩვენებელიც მეტი გამოდის საოჯახო მეურნეობების სტატისტიკაში. მაშ ასე, წარმოგიდგენთ საქართველოსა და მოლდოვას კვანტილებს შორის შემოსავლის განაწილების გრაფიკს 2016 წლის მონაცემების მიხედვით:
როგორც ხედავთ, მოლდოვას უფრო თანაბარი შემოსავლების განაწილება აქვს კვანტილებს შორის, ვიდრე ჩვენ. უმდიდრესი კვანტილი თუ ჩვენთან 43.6%-ს ფლობს, მოლდოვაში მათი მაჩვენებელი მთელი 7%-ით ნაკლებია. მოლდოვას პირველი 3 კვანტილი მეტ წილს ფლობს მათი ქვეყნის მთლიანი შემოსავლებიდან, ვიდრე ჩვენი დაბალშემოსავლიანი 3 კვანტილი ჩვენი შემოსავლებიდან. განსაკუთრებით აღნიშვნის ღირსია პირველი კვანტილის 10%-იანი მაჩვენებელი. აქედან, არც არის გასაკვირი, რომ მათი ჯინის კოეფიციენტი, მსოფლიო ბანკის მონაცემთა ბაზის მიხედვით, 2016 წელს იყო 26.3, როცა ჩვენი ჯინის კოეფიციენტი 36.5-ს შეადგენდა.[7] აღსანიშნავია, რომ ამ მაჩვენებლებს ადგილი აქვს ერთ სულზე შემოსავლის შემდეგ ფონზე: ჩვენი რეალური მშპ ერთ სულზე 2010 წლის დოლარებში 2016 წელს 4084$ იყო, როცა მოლდოვასთვის იგივე მაჩვენებელი 2063$-ს შეადგენდა, ანუ საქართველო ცხოვრების დონით მოლდოვას დაახლოებით 2-ჯერ აღემატება. თუ მშპ-ს აბსოლუტურ მაჩვენებლებს ავიღებთ, იქაც დაახლოებით იგივე განსხვავებას დავინახავთ. მიუხედავად ამისა, მოლდოვა მართლაც სამაგალითოა განვითარებად ქვეყნებს შორის ინკლუზიური ფაქტორების წარმატებულობით: დაბალი ჯინის კოეფიციენტებით, როგორც შემოსავლის, ასევე სიმდიდრის კუთხით, და ძალიან დაბალი სიღარიბის მაჩვენებლით. მათი მოსახლეობის რიცხოვნობა დაახლოებით 3 მილიონია. მოლდოვა წარმოადგენს სანიმუშო მაგალითს იმისა, რომ ჩვენნაირ განვითარებად და დაბალშემოსავლიან ქვეყანასაც შეუძლია ჰქონდეს შემოსავლებში დაბალი უთანაბრობა და დაბალი სიღარიბის დონე. საინტერესოა, რომ 2017 წელს მათი მშპ-ს 64.8% მომსახურების სფეროზე მოდიოდა, 21% მრეწველობაზე, ხოლო 14.2% სოფლის მეურნეობაზე, როცა 1989 წელს მომსახურების სფეროს მხოლოდ 24%-იანი მაჩვენებელი ჰქონდა.[8] 1999 წლიდან, როცა მათი ჯინის კოეფიციენტი 42.6%-ს შეადგენდა, 2016 წლისთვის 26.3%-ზე ჩამოვიდა. ეს ხაზს უსვამს მოლდოვაში სწრაფად განხორციელებულ პოსტ-ინდუსტრიულ პროცესებს და მომსახურების სფეროს ზრდის დადებით გავლენას უთანაბრობის აღმოფხვრაზე, რაც სწორედ კუზნეცის მიერ იყო წამოყენებული, როგორც უთანაბრობის შემამცირებელი ფაქტორი. როგორც მოლდოვას შემთხვევაში ვხედავთ, შემოსავლებში უთანასწორობის დაბალი მაჩვენებელი (ჯინის კოეფიციენტი) ემყარება ქვედა კვანტილების მაღალ წილს საერთო შემოსავლებში. ამ საკითხს უკავშირდება კუზნეცის მიერ ჩამოყალიბებული, განვითარებადი ეკონომიკებისთვის დამახასიათებელი, კიდევ ერთი ფაქტორი. ეს არის კუზნეცის კონცეფცია განვითარებადი ქვეყნების ქვედა კვანტილებთან დაკავშირებით, რომლის მიხედვითაც განვითარებული ქვეყნების ქვედა კვანტილებისგან განსხვავებით, განვითარებადი ქვეყნების ქვედა კვანტილს არ შეიძლება საერთო შემოსავლებში 6-7%-ზე დაბალი წილი და ერთ სულზე საშუალო შემოსავალი მთლიანად ქვეყნის საშუალო შემოსავლის 0.6 ან 0.7-ზე ნაკლები ჰქონდეს, ვინაიდან ისედაც დაბალი საშუალო შემოსავლის კიდევ უფრო ნაკლები წილი ადამიანის ცხოვრებისთვის საკმარისი ვეღარ იქნება. რა ხდება ჩვენთან ამ მხრივ? როგორც ჰისტოგრამაზე დავინახეთ, ყველაზე ღარიბი კვანტილის წილი საერთო შემოსავლებში არის 5.04%. გარდა ამისა, ვიყენებ კვანტილებად დაყოფილ და ინდივიდუალური შემოსავლების შესახებ მონაცემებს[9], საიდანაც მარტივი კალკულაციებით ჩანს, რომ 2016 წელს ქვედა კვანტილის საშუალო შემოსავალი 89.95 ლარი, მეორე კვანტილისა კი 154.39 ლარია, რაც 2016 წლის საშუალო შემოსავლის (268.51 ლარი; ფულადი და არაფულადი შემოსავლების ჯამი გაყოფილი მოსახლეობის რიცხოვნობაზე), შესაბამისად, 0.34 და 0.58 წილს წარმოადგენს. ეს ნიშნავს, რომ არათუ მხოლოდ პირველი კვანტილი, არამედ ვერც მეორე კვანტილი ვერ აღწევს ისედაც დაბალი მშპ ერთ სულზე მაჩვენებლის 0.6 წილს. შინამეურნეობებს რომ დავუბრუნდეთ, აქაც პირველი და მეორე კვანტილის ოჯახები საშუალოდ მთლიანი საშუალო შემოსავლის, შესაბამისად, 0.25 და 0.48 წილს ფლობენ. ამ საკითხს მივყავართ კუზნეცის შემდგომ კონცეფციამდე, სადაც ნათქვამია, რომ განვითარებადი ქვეყნებისთვის მაღალი უთანაბრობა განსაკუთრებით მძიმე იქნება. მართლაც, წინა აბზაცში მოყვანილი ინფორმაციის ფონზე, აშკარა ხდება თუ რატომ არის ჩვენს ქვეყანაში სიღარიბის დონე ასეთი მაღალი - სიღარიბის აბსოლუტურ ზღვარს ქვემოთ მყოფი მოსახლეობის წილი 22%-ია, ანუ ქვეყანაში ყოველი მეხუთე ადამიანი სიღარიბის ზღვარს ქვემოთ იმყოფება. ეს დიდწილად სწორედ შემოსავლებში მაღალი უთანასწორობით და ეკონომიკური ზრდის დაბალი ტემპით აიხსნება. ამასთან, ეკონომიკურ და სოციალურ ინსტიტუტებზე ინდუსტრიალიზაციის საწყისი ეტაპის გავლენა მართლაც უთანაბრობის ზრდაში აისახა 1990-იან წლებში. საბჭოთა კავშირის დაშლის შემდეგ ინსტიტუციური განახლების პროცესი ნელი და მტკივნეული ტემპით მიმდინარეობდა, კიდევ უფრო მდიდრდებოდნენ მდიდარი ადამიანები, მოსახლეობის უდიდესი ნაწილი კი გაჭირვებაში რჩებოდა. ვინაიდან შინამეურნეობების გამოკვლევებს საქსტატი მხოლოდ 2009 წლიდან აწარმოებს, ამ შემთხვევისთვის ვიყენებ კვლავ მსოფლიო ბანკის ინდივიდუალური შემოსავლების შესახებ ინფორმაციას, რომელიც 1996 წლიდან იწყება. კვანტილების შესახებ აღნიშნულ მონაცემებზე დაყრდნობით ჩანს, რომ უმდიდრეს და უღარიბეს კვანტილებს შორის განსხვავება მკვეთრად გაიზარდა 1996 წელს და 4-5 წლის განმავლობაში ნარჩუნდებოდა ეს სხვაობა. სავარაუდოდ სხვაობის ზრდის პროცესი 1996 წლამდე რამდენიმე წლით ადრე დაიწყო, რის შესახებაც უბრალოდ სტატისტიკური მონაცემები არ გვაქვს. საბოლოო ჯამში, შეგვიძლია 1990-იანი წლები შემოსავლებში უთანაბრობის ზრდის წლებად მოვიხსენიოთ. გარდამტეხი ფაზა კუზნეცის განსაზღვრებით, თუ ქალაქში 4-ჯერ მეტია ერთ სულზე შემოსავლის მაჩვენებელი ვიდრე სოფელში, მაშინ უთანაბრობის შემცირება დაიწყება მას შემდეგ, რაც მოსახლეობის 30% ქალაქებში იქნება დასახლებული, ხოლო თუ შემოსავლებში ქალაქი სოფელს 2-ჯერ აღემატება, უთანაბრობა კლებას დაიწყებს მაშინ, როცა მოსახლეობის ნახევარი ურბანულ დასახლებებში მოიყრის თავს. საქართველოში შემოსავლის სოფელსა და ქალაქს შორის განაწილების სტატისტიკა საქსტატს აქვს, თუმცა ეს სტატისტიკა გვიჩვენებს მონაცემებს 2006 წლიდან. ამის გამო, უნდა ვიმსჯელოთ მიმდინარე წლების მონაცემების მიხედვით. ჩემდა გასაკვირად საქართველოს სოფლებში ერთ სულზე საშუალო შემოსავლები (საქსტატის მონაცემები სოფლის აბსოლუტურ შემოსავალზე გავყავი სოფლის მოსახლეობის რიცხოვნობაზე) ბევრად არ ჩამორჩება ქალაქად მაცხოვრებელთა საშუალო შემოსავლებს. 2011 წელს ქალაქში საშუალო შემოსავალი მხოლოდ 1.19-ჯერ აღემატებოდა სოფელში საშუალო შემოსავალს, 2016 წელს კი ეს განსხვავება 1.35 გახდა. აქედან უნდა დავასკვნათ, რომ ჩვენთან ინდუსტრიალიზაციისა და პოსტ-ინდუსტრიული პროცესი ჯერ კიდევ არ დაწყებულა მთელი სიმძლავრით. ასევე, კუზნეცის მაგალითებისგან განსხვავებით, რომლებიც 2 საუკუნის წინანდელ ტენდენციებს ხსნიან, ამჟამინდელი მსოფლიო ეკონომიკური მდგომარეობა სულ სხვაგვარია და შესაბამისად ინდუსტრიალიზაციის მიმდინარე პროცესიც ჩვენს ქვეყანაში. ისიც საგულისხმოა, რომ მოყვანილი სტატისტიკა სრულყოფილად არ ასახავს საქართველოს ქალაქებსა და სოფლებს შორის ცხოვრების დონეში არსებულ განსხვავებას. თუ კუზნეცის მსჯელობიდან არ ამოვვარდებით, ვინაიდან ჩვენთან ეს შეფარდება არის 1.35:1, რაც 2:1 შეფარდებას 1.48-ჯერ ჩამორჩება, ქალაქში მაცხოვრებელთა წილიც შესაბამისად 1.48-ჯერ უფრო მაღალ ნიშნულზე უნდა ავიდეს, რომ უთანაბრობის შემცირება დაიწყოს. გამოდის, რომ ჩვენთან უთანაბრობის შემცირება მას შემდეგ დაიწყება, რაც ქალაქებში მოსახლეობის 75% დასახლდება. თუმცა, თუ გავითვალისწინებთ ქალაქსა და სოფელს შორის საშუალო შემოსავლების განსხვავების ზრდის ტენდენციასაც, უნდა ვივარაუდოთ, რომ ურბანულ დასახლებებში მოსახლეობის 65-70%-ის დასახლებაც საკმარისი იქნება, რომ უთანაბრობის შემცირება დაიწყოს. 2018 წლისთვის ქალაქების მაცხოვრებელია საქართველოს მოსახლეობის 58.3%. თუ 2012-2018 წლების ზრდის ტემპს გამოვიყენებთ მონაცემთა ჯაჭვური ზრდის ტემპის წესით პროგნოზირებისთვის, მივიღებთ, რომ ქალაქების მაცხოვრებელთა წილი 60%-ს მიაღწევს 2025 წელს, 65%-ს 2042 წელს, ხოლო 70%-ს 2058 წელს. თუ ეკონომიკური ზრდის ტემპი მართლაც გაიზრდება, 2025 წლისთვის ქალაქად დასახლებული მოსახლეობის 60%-თან ერთად, უკვე შესაძლებელი იქნება უთანაბრობის თანდათანობითი შემცირება. აქვე აღვნიშნავ, რომ საიმონ კუზნეცის მიერ გამოკვლეული ქვეყნების, აშშ-ს, გერმანიის და ინგლისის, შემთხვევებში, უთანაბრობის ზრდის ფაზა დაახლოებით 60 წელი გრძელდებოდა. თუმცა, ეს ხდებოდა მე-19 საუკუნეში, და არ მგონია დღევანდელ, დაჩქარებულ, გლობალიზებულ და პოსტ-ინდუსტრიულ მსოფლიო ეკონომიკურ გარემოში ჩვენც 2050 წლამდე (1990-იანებიდან) უნდა ველოდოთ უთანაბრობის შემცირების პროცესს. ჩემი აზრით, თანამედროვე პირობებში კუზნეცის მრუდის საწყისი ეტაპის დასრულება და უთანასწორობის ზრდის შეჩერება ბევრად მცირე დროშია შესაძლებელი, მაღალი ეკონომიკური ზრდისა და ინკლუზიური განვითარების მეშვეობით. დასკვნითი ფაზა კი, იქიდან გამომდინარე, რომ ის არამხოლოდ ეკონომიკურ, არამედ გარკვეულ სოციალურ-ინსტიტუციურ საკითხებსაც ეყრდნობა, შესაძლოა დროში უფრო გაწელილი, ნელი პროცესი გამოდგეს. დასკვნითი ფაზა რაც შეეხება დასკვნით ფაზას, სადაც უთანასწორობა შემოსავლებში ეკონომიკურ ზრდასთან ერთად მცირდება, მისი მახასიათებლები ნაკლებად სავარაუდოა უკვე განხორციელებული იყოს საქართველოს ეკონომიკაში. კუზნეცის მიხედვით, უთანაბრობის კლებას იწვევს დემოგრაფიული ფაქტორი, რომლის მიხედვითაც, შედარებით დაბალშემოსავლიან ოჯახებს მეტი შვილი ჰყავთ, ვიდრე მდიდრებს, და აქედან გამომდინარე, დროთა განმავლობაში მდიდარ კვანტილებში მდიდრების კლებად რიცხოვნობას ზრდადი რიცხოვნობის შედარებით დაბალშემოსავლიანები ავსებენ. კონკრეტული მდიდრების სიმდიდრე შესაძლოა ნარჩუნდება, ან თუნდაც იზრდება კიდეც, მაგრამ ვინაიდან კვანტილში შინამეურნეობების ფიქსირებული რიცხოვნობა იგულისხმება, დაბალი შობადობის გამო კლებადი მდიდარი შინამეურნეობების ადგილს, რიცხოვნობაში ზრდადი დაბალშემოსავლიანი შინამეურნეობები იკავებენ. ერთ კვანტილში თავს იყრიან კიდევ უფრო გამდიდრებული, მაგრამ მცირე ოდენობის მდიდარი შინამეურნეობები, და შედარებით დაბალშემოსავლიანი ოჯახები. ამის გამო, დროთა განმავლობაში, ხდება შედარებითი გამოთანაბრება კვანტილებს შორის. უნდა ითქვას, რომ ეს არის ის ერთ-ერთი პროცესი, რომელიც უთანაბრობის კლებას გრძევადიან პერიოდში ახერხებს, და არა დროის მოკლე მონაკვეთში. შემდეგი ორი ფაქტორი სტრუქტურულია: ეკონომიკის დინამიკურობა - ახალი დარგების განვითარება და მომსახურების სფეროს ზრდა. საქართველოს ეკონომიკაში სტრუქტურული ცვლილებები ნამდვილად მიმდინარეობს. თუ 2006 წელს მთლიანი შიდა პროდუქტის დარგობრივ სტრუქტურაში მოწინავე ადგილებს სახელმწიფო მმართველობა და ჯანმრთელობის დაცვა და სოციალური დახმარება იკავებდნენ, 2017 წელს ისინი, შესაბამისად, მეოთხე და მეშვიდე ადგილებზე იმყოფებიან, ხოლო მოწინავე ადგილებს უთმობენ ვაჭრობას, მრეწველობას და ტრანსპორტი/კავშირგაბმულობას. ეს ფაქტორი თავისთავად უთანასწორობის შემცირებას ემსახურება, ვინაიდან თუ მაღალ შემოსავლიანი ჯგუფების წარმომადგენლები თავის მოგროვებულ აქტივებს ახალი, მზარდი და მაღალ მოგებიანი დარგებისკენ არ მიმართავენ, მათი არსებული აქტივებიდან, ახალი დარგების წარმომადგენლების აქტივებთან შედარებით, გრძელვადიანი ამონაგები მნიშვნელოვნად შემცირდება. შესაბამისად, წარმოების დარგების სწრაფი ცვლილებები მდიდარი მოსახლეობის პოზიციების შერყევას და დაბალშემოსავლიანი მოსახლეობისთვის გამდიდრების შანსს ნიშნავს. თანდათანობით იზრდება მომსახურების სფეროს შემოსავლები, რაც ასევე მეტ შანსს აძლევს დაბალშემოსავლიან მოსახლეობას, ვინაიდან ის დამოკიდებულია, არა სოციალურ სტატუსზე ან სიმდიდრის ქონაზე, არამედ პროფესიონალიზმზე და კონკურენტუნარიანობაზე. როგორც მოლდოვას მაგალითზე ვნახეთ, მათი საოცრად დაბალი უთანასწორობა შემოსავლებში, სხვა ფაქტორებთან ერთად, სავარაუდოდ მომსახურების მშპ-სთან მკვეთრად გაზრდილმა წილმა (64.8%) გამოიწვია. მაღალი დონის პროფესიონალების ჩამოყალიბებას შესაბამისი განათლების სისტემა სჭირდება, რაც ამ მხრივაც აუცილებელს ხდის განათლებაზე აქცენტის გაკეთებას. საბოლოოდ, კუზნეცის მიხედვით, უთანაბრობა მცირდება, არა იმდენად სოფელში დარჩენილი დაბალშემოსავლიანი მოსახლეობის წილის ზრდით, არამედ ურბანულ დასახლებაში მყოფი დაბალშემოსავლიანი მოსახლეობის მოძლიერებით, რაც აყალიბებს ძლიერ საშუალო ფენას, ზრდის შუა 3 კვანტილის წილს და ამცირებს უმდიდრესი კვანტილის მაჩვენებელს. ქალაქში ახლად დასახლებული მოსახლეობა ნელ-ნელა წარმატებით მკვიდრდება, მათი შვილები კი პირდაპირ ურბანულ გარემოში იბადებიან, ადაპტაციის პერიოდი აღარ სჭირდებათ და მომავალში უკეთეს შანსებს ფლობენ, რათა შექმნან ძლიერი საშუალო ფენა. ამასთან, ძველად დამკვიდრებული მოსახლეობა დროთა განმავლობაში ალღოს უღებს ახალ სისტემას, ახალ გარემოს, და ახერხებს წინსვლას ზემოთ ნახსენებ სტრუქტურულ გარდაქმნებში თავის დამკვიდრების გზით. ეს ფაქტორიც გრძელვადიანი მოქმედებით ხასიათდება. საქართველოში 2018 წელს მოსახლეობის 58% ქალაქებში ცხოვრობს, ამ მაჩვენებლის ზრდის ტემპის გათვალისწინებით კი უნდა ვივარაუდოთ, რომ ის 50%-ს დიდი ხნის წინ გადასცდა (1969 წელს). ეს იძლევა იმის თქმის საშუალებას, რომ ურბანული დასახლებების დაბალშემოსავლაინი მოსახლეობის მოძლიერების პროცესი დაწყებული უნდა იყოს, თუმცა რამდენ ხანში მიაღწევს ის სრულ რეალიზაციას, მხოლოდ ეკონომიკურ ზრდასა და მის ინკლუზიურობაზეა დამოკიდებული. და ბოლოს, მნიშვნელოვანია ურბანული მოსახლეობის დაბალშემოსავლიანი ნაწილის პოლიტიკური ძალაუფლების ზრდა. პოლიტიკური გადაწყვეტილებები და საკანონმდებლო ცვლილებები, რომლებიც პირდაპირ ემსახურება შემოსავლებში უთანაბრობის შემცირებას, სწორედ ამ ჯგუფების ნაკარნახევია, ვინაიდან დემოკრატიულ სისტემაში პოლიტიკოსები უმრავლესობის დაკვეთას ასრულებენ, უმრავლესობისა, რომელიც უმდიდრესი კვანტილისგან განსხვავებით, უკმაყოფილოა თავისი ყოფით და საკუთარი მდგომარეობის გაუმჯობესებას ითხოვს. საქართველოში ამ ფაქტორის არსებობას ისიც ადასტურებს, რომ საქართველოს შრომის, ჯანმრთელობისა და სოციალური დაცვის სამინისტროსთვის ასიგნებების სახით 2017 წელს 3,415,800,000 ლარი იყო გამოყოფილი, რაც საქართველოს 2017 წლის სახელმწიფო ბიუჯეტის 29%-ია, ხოლო მშპ-ს 9.11%.[10] საბოლოოდ, კუზნეცი თავის მოდელში უთანაბრობის მარტივ საზომად იყენებს უმდიდრესი და უღარიბესი კვანტილების შემოსავლების წილებს შორის სხვაობას და ამ სხვაობის ცვლილებას დროთა განმავლობაში ეკონომიკურ ზრდასთან ერთად. ვინაიდან საოჯახო მეურნეობების შესახებ მონაცემები მხოლოდ 2009 წლიდან გვაქვს, იძულებული ვარ კვანტილებს შორის აღნიშნული სხვაობები ინდივიდუალური შემოსავლების კვანტილებზე გავაკეთო, რომლის მონაცემთა ბაზაც 1996 წლიდან იწყება. გთავაზობთ ხაზოვან დიაგრამას, სადაც ასახულია საქართველოს უმდიდრეს კვანტილსა და უღარიბეს კვანტილს შორის არსებული სხვაობა:
როგორც ხედავთ, დიაგრამა ვერ გვიჩვენებს ზუსტად კუზნეცის მრუდის ანალოგიას, თუმცა ამის მოლოდინი არც უნდა გვქონოდა. მეტად სავარაუდოა, რომ ეს დიაგრამა მცირედი ნაწილია უფრო ფართო მრუდისა, რომლის განვითარებაც დროთა განმავლობაში გამოიკვეთება. ამ შემთხვევაში შემიძლია გამოვთქვა მოსაზრება, რომ უთანაბრობის ორივე აღმავალი პერიოდი (სადაც სხვაობა იზრდება), 1996-1998 (სავარაუდოდ 1996-მდე დაწყებული) და 2004-2010 კუზნეცის მრუდის საწყისი სტადიის ფაქტორებისგან იყო გამოწვეული. საბჭოთა კავშირის დანგრევამ და საქართველოს სუვერენულ სახელმწიფოდ ჩამოყალიბებამ 90-იან წლებში ეკონომიკური და სოციალურ-ინსტიტუციური გარემოს ცვლილებები გამოიწვია. ამ ინსტიტუციურ ნგრევას, როგორც ჩანს, მართლაც მოჰყვა დაბალი ეკონომიკური ზრდის ფონზე, მხოლოდ მდიდრების (კიდევ უფრო) გამდიდრება და უთანაბრობის გაზრდა შემოსავლებში. შემდეგ, 2004 წლამდე დაღმავალ პერიოდზე რთულია საუბარი, თუმცა იმის თქმა ნამდვილად შეიძლება, რომ უთანაბრობის შემცირება კუზნეცის ფაქტორებს არ გამოუწვევიათ, ვინაიდან, საწყისი და დასკვნითი ფაზის ფაქტორები ესეთ მცირე მონაკვეთში არ ენაცვლებიან ერთმანეთს. შემდეგ, 2010 წლამდე აღმავალი მონაკვეთი, უთანაბრობის ზრდა, კვლავ ინსტიტუციურმა განახლებამ გამოიწვია, რაც ახალი ხელისუფლების მოსვლით იყო განპირობებული 2003 წლიდან. როგორც წინა შემთხვევაში, აქაც ინსტიტუციური ნგრევით და ცვლილებებით მდიდრებმა ისარგებლეს, დაბალშემოსავლიან ფენებს კი ადაპტაციისთვის მეტი დრო დასჭირდათ. 2010 წლიდან მოყოლებული ჩანს უთანაბრობის კლების ტენდენცია, რაც მიგვანიშნებს, რომ ურბანულ დასახლებაში მყოფი მოსახლეობის დაბალშემოსავლიანი ნაწილი მოძლიერებას იწყებს. ამასთან მნიშვნელოვან როლს თამაშობს სახელმწიფო პოლიტიკა და საერთაშორისო ორგანიზაციებთან კოორდინირებული მუშაობა. ვიმედოვნებ, რომ უთანაბრობაში დაღმავალი ტრენდი მართლაც კუზნეცისეული დასკვნითი ფაზის დასაწყისია. იმისათვის, რომ კიდევ უფრო მრავლისმთქმელი გამეხადა საქართველოს ეკონომიკაში უთანაბრობის ტენდენციებისა და მისი ეკონონომიკურ ზრდასთან კავშირი, გამოვიყენე სტატისტიკური პროგრამა Eviews, რომელშიც ვექტორული ავტორეგრესიის მოდელით (VAR) დავაკავშირე ინდივიდუალური შემოსავლების კვანტილებად განაწილებული მონაცემები და მშპ ერთ სულზე ზრდის ლოგარითმული ფუნქცია. Impulse-Response (იმპულსი-ასახვა) ანალიზი კარგად ასახავს მშპ ერთ სულზე ზრდის გავლენას თითოეული კვანტილის შემოსავლების წილზე: როგორც გრაფიკებიდან ჩანს, მშპ ერთ სულზე ზრდის 1%-ით გაზრდილი მაჩვენებელი ამცირებს უმდიდრესი კვანტილის წილს მთლიან შემოსავლებში და ზრდის ყველა დანარჩენი კვანტილების წილებს. ყველაზე დაბალშემოსავლიანი კვანტილის წილი დაახლოებით 0.04-ით იზრდება (მაგ: 6+0.04=6.04%). აღნიშნული ეფექტი დაახლოებით 5 წლის განმავლობაში ნარჩუნდება. მშპ ერთ სულზე ზრდის პროცესის გაგრძელებასთან ერთად კი ეს ეფექტი მუდამ განახლებადია. გარდა ამისა, აღნიშნული მოდელით გავაკეთე პროგნოზი, სადაც ასახულია კვანტილების შემოსავლების წილების მომავალი ცვლილებები:
პროგნოზიდან ირკვევა, რომ პირველი (ამ შემთხვევაში უმდიდრესი) კვანტილის წილი 2020 წლამდე ზრდას განაგრძობს, 50%-მიუახლოვდება, შემდეგ კი შემცირებას დაიწყებს. სიმდიდრით მეორე კვანტილის შემოსავლების წილი 2018 წლიდან 2021 წლამდე შემცირდება, ბოლოს კი მცირედით ზრდის ტენდენცია ჩანს. მესამე და მეოთხე კვანტილების შემოსავლებიც 2020 წლამდე შემცირდება, ხოლო ყველაზე დაბალშემოსავლიანი კვანტილის წილი 2019 წლამდე შემცირდება, 5%-ს ჩამოსცდება, ხოლო შემდეგ ზრდას დაიწყებს. ქვედა კვანტილი, როგორც ზემოთ ვნახეთ, ყველაზე მეტად არის დამოკიდებული მშპ ერთ სულზე ზრდის მაჩვენებელზე. პროგნოზშიც, ბოლოს წინა დიაგრამაზე ჩანს, მცირე ჩავარდნა აქვს 2018 წლის მშპ ერთ სულზე ზრდის ტემპს, რაც დიდწილად განაპირობებს ქვედა კვანტილის ვარდნასაც 2019 წლამდე. მართლაც, ქვეყნის ძირითადი მონაცემებისა და მიმართულებების დოკუმენტში, ძირითადი ეკონომიკური და ფინანსური ინდიკატორების ნაწილში, საბაზისო სცენარში ჩანს, რომ მშპ ერთ სულზე ზრდის ტეპი 2017 წელს არსებული 10.25%-იანი მაჩვენებლიდან 2018 წელს ჩამოქვეითდება 8.16%-იან მაჩვენებელზე[11], რაც ჩემმა VAR მოდელმაც ზუსტად განსაზღვრა. ეს კიდევ უფრო მეტ ავთენტურობას მატებს გაკეთებულ პროგნოზს. დასკვნა კუზნეცის მრუდის საწყისი ფაზის ფაქტორების ანალიზი ცხადყოფს, რომ წარმოუდგენელია, მოვლენების ბუნებრივი დინებით განვითარებისას, უთანაბრობა შემოსავლებში კიდევ უფრო გაიზარდოს. ამის თქმის საშუალებას შემდეგი ფაქტები მაძლევს: 1. საქართველოში უთანაბრობა უკვე საკმარისად გაზრდილია და კუზნეცის თვალსაზრისს განვითარებად ქვეყნებში უმდიდრესი კვანტილის დიდი წილისა და საშუალო ფენის დაბალი შემოსავლების შესახებ, სრულებით ამართლებს. ამავე ფაქტორის გაგრძელებაა ის ფაქტი, რომ ყველაზე დაბალშემოსავლიანი 2 კვანტილის საშუალო შემოსავლები მთელი მოსახლეობის საშუალო შემოსავლებთან მიმართებით მხოლოდ 0.34 და 0.58 წილს შეადგენს, პირველი კვანტილი კი საერთო შემოსავლის მხოლოდ 5%-ს შეადგენს. როგორც ხედავთ, ეს მაჩვენებლებიც იმდენად დაბალია, რომ აღარ უნდა გაუარესდეს. 2. კუზნეცის თქმით, უთანაბრობა შემოსავლებში განსაკუთრებით მძიმე იქნება განვითარებად ქვეყნებში, რაც საქართველომ უკვე გამოსცადა. 2017 წელს ჩვენთან სიღარიბის აბსოლუტური მაჩვენებელი 22%-ს შეადგენდა (2007 წელს 39%), რაც ნიშნავს, რომ ქვეყანაში ყოველი მეხუთე ადამიანი სიღარიბის ზღვარს ქვემოთაა, უმუშევრობის დონე კი 14% (არაოფიციალური დასკვნებით ეს მაჩვენებელი მეტსაც შეადგენს). 3. ეკონომიკურ და სოციალურ ინსტიტუციებზე განვითარების ახალმა სტადიამ ჩვენი ქვეყნისთვის უკვე იმოქმედა უარყოფითად, უთანაბრობის ზრდის პერიოდები ემთხვევა საბჭოთა კავშირის დაშლის შემდგომ პერიოდს და 2003 წელს ახალი ხელისუფლების მოსვლას სათავეში. 4. ეკონომიკური ზრდის მაჩვენებლები ბოლო წლებში უკეთესის არსებობის სურვილს ბადებდა, განსაკუთრებით 2013-16 წლებში. 5. თუ, კუზნეცის მიხედვით, მე-19 საუკუნეში უთანაბრობის ზრდის პროცესი 60 წელი გრძელდებოდა, დღევანდელ რეალობაში, დაჩქარებულ, გლობალიზებულ და ტექნოლოგიებით დატვირთულ მსოფლიოში, ამ პროცესის ხანგრძლივობა შესაძლოა განახევრდა კიდეც. საქართველოში ეს პროცესი 1990-იანი წლებიდან დაიწყო და სრულიად საკმარისი დროა გასული უთანაბრობის ზრდის ფაზის რეალიზებისთვის. როგორც ხედავთ, კუზნეცის მრუდის საწყისი, უთანაბრობის გაზრდის, ფაზის ეს ფაქტორები საქართველოსთვის აჩვენებს, რომ საქართველოში უთანაბრობა საკმარისად გაიზარდა იმისათვის, რომ კუზნეცის მრუდის საწყისი ფაზა დასრულებულად, ან დასრულების პროცესში მყოფად გამოვაცხადოთ. დასკვნითი (უთანაბრობის შემცირების) ფაზის ფაქტორები კი ცხადყოფს, რომ საქართველოში უთანაბრობის შემცირების პროცესი ნელ-ნელა აქტიურდება. 1. ქალაქებსა და სოფლებში მაცხოვრებელთა რიცხოვნობის ანალიზიდან ვაჩვენე, რომ 2025 წლისთვის ქალაქებში მაცხოვრებელთა წილი მთელ მოსახლეობაში 60% იქნება, რაც, კუზნეცის მიხედვით, უთანაბრობის შემცირების პროცესს განაპირობებს. 2. ეკონომიკის დინამიკურობის ფაქტორიც თავის როლს თამაშობს ჩვენს ეკონომიკაში. უკანასკნელი 10 წლის განმავლობაში მოწინავე დარგები გახდნენ ვაჭრობა და მრეწველობა. დინამიკური სტრუქტურული გარდაქმნები ხელს უწყობს ღარიბი მოსახლეობისთვის გამდიდრების შანსების გაჩენას. მომსახურების სფეროს ზრდაც, თავის მხრივ, ამცირებს უთანაბრობას. მოლდოვას მაგალითზე ვნახეთ, რომ ჩვენნაირ, ჩვენზე უფრო ღარიბ ქვეყანასაც კი შეუძლია ჰქონდეს დაბალი უთანასწორობა შემოსავლებში. მათი ეკონომიკის სტრუქტურიდან კი ირკვევა, რომ მომსახურების სფერო შეადგენს მშპ-ს თითქმის 65%-ს. 3. კუზნეცის მიხედვით, უთანაბრობა მცირდება ურბანული დასახლებების დაბალშემოსავლიანი მოსახლეობის მოძლიერებით, გამდიდრებით, რომლებიც ქმნიან ფინანსურად ძლიერ საშუალო ფენას. თუ გავითვალისწინებთ საქართველოში ქალაქებში მაცხოვრებელთა რიცხოვნობის ზრდის ტენდენციას (2008-2018), ქალაქებში მაცხოვრებელთა წილი მთლიან მოსახლეობაში 50%-ს დიდი ხნის გადამცდარია (1969 წელს), რაც მაფიქრებინებს, რომ ურბანული დასახლებების დაბალშემოსავლიანი ფენის დიდი ნაწილის ადაპტაციის პერიოდი დასრულებული უნდა იყოს და მოძლიერებას უნდა იწყებდეს. 4. მნიშვნელოვანია ამ დაბალშემოსავლიანი მოსახლეობის პოლიტიკური ძალაუფლებაც. პოლიტიკოსები არ დაუშვებენ უთანაბრობის კიდევ უფრო ზრდას და მოსახლეობის დიდი წილის გაწბილებას. 5. დამატებით ფაქტორს წარმოადგენს ჩემს მიერ გაკეთებული ანალიზი და პროგნოზი. რეგრესიული ანალიზის მიხედვით, მშპ ერთ სულზე ზრდის მაჩვენებელი სტატისტიკურად მნიშვნელოვან გავლენას ახდენს მხოლოდ პირველ კვანტილზე და თანაც პოზიტიურად მოქმედებს მასზე. ამასთან, VAR მოდელის პროგნოზიდან ირკვევა, რომ მცირე ჩავარდნის შემდეგ, რომელსაც ადგილი 2019 წელს ექნება, პირველი კვანტილის წილი მთლიან შემოსავლებში ზრდას განაგრძობს (ეს პროცესი 2010 წლიდან არის დაწყებული). ამას ემატება ჯინის კოეფიციენტის კლებადი ტენდენციაც. საბოლოოდ, კუზნეცის მრუდის დასკვნითი ფაზა საქართველოში სავარაუდოდ, ან 2010 წელს დაიწყო, ან მცირე რყევების შემდეგ უახლოეს წლებში (შესაძლოა 2019 წლიდან, 2025 წელს კი უკვე აქტიურად უნდა მიმდინარეობდეს) დაიწყება ურბანული მოსახლეობის კიდევ უფრო ზრდის და მოძლიერების კვალდაკვალ. ეს, თავის მხრივ, ნიშნავს საქართველოს ეკონომიკის ინკლუზიურობის ზრდას. გამოყენებული ლიტერატურა
[1] საიმონ კუზნეცი (1901-1985) - ბელორუსი წარმოშობის ამერიკელი ეკონომისტი, 1971 წლის ნობელის პრემიის ლაურეატი, ინსტიტუციონალისტი [2] Simon Kuznets - Economic Growth and Income Inequality, The American Economic Review, Vol. 45, No. 1 (Mar., 1955), pp. 1-28 [3] Robert J. Barro - Inequality and GrowthRevisited, January 2008 [4]Alfredo Saad-Filho – Growth, Poverty and Inequality: From Washington Consensus to Inclusive Growth, November 2010, Economic & Social Affairs [5] მთლიანი გამოშვების სტრუქტურა 2017 წელს, www.geostat.ge [6] World Economic Forum – The Inclusive Development Index 2018, Summary and Data Highlights [7] The World Bank, data.worldbank.org - Gini Index (World Bank estimate), Georgia, Moldova [8] www.indexmundi.com – Moldova GDP – composition by sector [9] The World Bank - data.worldbank.org [10] საქართველოს სახელმწიფო ბიუჯეტი 2017, თავი VI - საქართველოს სახელმწიფო ბიუჯეტის ასიგნებები, www.MOF.ge [11] ძირითადი ფინანსური და ეკონომიკური ინდიკატორები (საბაზისო სცენარი), დანართი N1.1, www.MOF.ge |